Tukram chulhnu, 

Thuva awmhar lung di a ko.

A chhang silo, arang ka vaih sei zel e.

Riakmaw valeng iang in kei pawh, 

Thiamgthing zar ka zawng e.

Riang taka awm te hi ka in hmeh zo tawh a. Nuam te pawh hi ka ti zawk mah mah tawh.

Rilruna taka awm te hi ka thiam zo tawh a, tawrh nep dan te pawh ka thiam zo tawh. Mal ngawih ngawiha lo in hre ve te hian ka mal zia min hriatchhuah tir lek fang a. Di zûn ngaia lunglen, auh auh pawh a sawt tawh lo ngaia, hun leh ni chhiar na hringnun chuan mittui a kai chhuak a, biang ah a lo luang thin. Chung nun te chu ka in hmeh zo vek tawh a. Chutiang nun in hmeh tur a, hringnun par vul lai kan chen lai khan, par mawi te pawh alo chuai leh mai thin tih ka lo dawn lo khan heng hringnun te hi min hriat thiam tir zawk hlauh si alo ni a. Lenrual lungduh lenlai chulhnu ngaia lunglen na chuan, hun kal tawh ah min hruai kira, mitthla in kan hlimlai te ka thlir kir a, ka rauthla in ka fang thin. Chu erawh chuan, ka hringnun a ti hausa hlauh si. Nunhluh theuh theuh tun hun a tan hian an hlutna ava in anglo tak em!!

Zingtian lenkawl êng in, zo dai boruak thiangkar ah, i laikhum thlehnem puan sirah hnawl in, tawnmang hnutiang chhawn zai rel tawh la. Sikni êng mawina zungzam in a fan vel zoram lui dung leh tlang tin mai chu thlirla, a mawina chuan i lunglai a dum ngei ang le.

A mawinate an bo zo a, i lung a dum lo a lo nih hloh si chuan, i suangtuahna thla chu zuang chhuak in, ram tin mai chu fang la, engtin nge zofaleng ten, kan ram mawina par kan chhuan tir leh ang tih chu i ngaihtuahna thiang tak hmang chuan fing tak in duhthu han sam la. Chu i duhthusam ram mawina i hmuh chu ti pui tling tur in, i puan ven sawi chhing la, kal siam ve tawh khai. Chul mailo a kan awih nan zoram par hi a par amawi zual zel nan. Chutin hringnun pawh a mawi thin e